القائمة الرئيسية

الصفحات

أخبار [LastPost]

🔰كيفاش دخل الفلوس من منصة اليوتيوب. في ظرف 6 شهور.

كيفاش دخل الفلوس من منصة اليوتيوب. في ظرف 6 شهور.



◀️كلشي تيعرف يوتيوب كلشي تيعرف أدسنس، ولكن علاش الناس كدخل الفلوس ونتا لا ؟


➖الجواب لحقاش الناس كتبدل مجهود وكتصبر ونتا معجاز لحقاش لاقي لي يصرف عليك. وهاد السبب بالضبط هو لي غيخليك ضعيف ومتأخر فحياتك الإجتماعية والعملية.

لذلك أول مهمة تقدر تبدا بيها حياتك فعالم المشاريع وتكتاشف بيها مهاراتك فتدبير الامور والبحث عن الحلول ، هو تنجح قناتك فاليوتيوب وتقاتل عليها ....


📌شحال نقدر نربح من اليوتيوب فالمتوسط ؟


➖أقل مبلغ خاصك توصل ليه باش يدوزو ليك الفلوس هو 70$ يعني 700 درهم وقل من هاد المبلغ مغيدوزش ليك. أما أعلى مبلغ فراه تيوصل تال 30 مليون فالشهر فالمغرب. ولكن المتوسط هو مابين 8 تال 12 مليون فالشهر.


هادشي لا كنتي مفعل جميع انواع الدعايات، أما لا كنتي محيد الدعايات ديال القمر والخمر ومواقع التعارف الجنسي وداكشي... فراه تقدر توصل ما بين 3 تال 8 فالشهر. ولكن هنا راه تنهضرو على عدد مشاهدات فالفديو الواحد كتوصل تال 500k .


📌فين أنعرف شحال ربحت وفين أندخل حسابي البنكي ونتحكم فالإعلانات لي كتبان فقناتي فاليوتيوب ؟


➖شحال ديال الفلوس دازو ليك، شحال واصل فهاد الشهر، فين أدخل الكونت ديالك ديال البنك فين غتعدل قائمة الإعلانات لي باغيهم ولا ماباغيهمش يبانو فالقناة ديالك وحوايج آخرين، هادشي كلو كتحكم فيه من حسابك على Asense ولي مكتحتاجش تسجل فيه مادام عندك كونت Gmail . يكفي غير دخل مباشرة بحالي داخل لحسابك Gmail وهانتا فتحتي كونت فالأدسنس.


📌كيفاش غتفتح قناة فيوتيوب ؟


➖القنوات كينين زوج الانواع كاين قناة بروفيسيونيل وقناة عادية.

◀️أما القناة العادية فهي واحد القناة بدائية، كتصاوب تلقائيا فاش كتصاوب كونت فاليوتيوب أول مرة، يعني تيكون غير واحد فقط هو المدير ديالها وهو مول gmail لي صاوب الكونت فاليوتيوب. 

لذلك فاش تبغي تصاوب قناة حاول تصاوبها كقناة بروفيسيونيل، ماشي عادية Standar.


◀️القناة البروفيسيونيل أو قناة علامة تجارية Brand، هي واحد القناة كتكون بحال الباج، والكونت ديالك ديال Gmail هو لي تيكون آدمين فيها، وتقدر تزيد فيها كونطات آخرين باش يديروها ويبارطاجيو فيها فيديوات بشكل جماعي. يعني متخدمش بالكوت لي تسجلتي بيه كقناة، صاوب قناة جديد وتأكد انها قناة Brand يعني لا بدلتي سميتك فجيميل متبدلش فاليوتيوب، ولا بدليتي سميتك فاليوتيوب متبدلش فالكونت ديالك فالجيميل، هادي أول وأهم خطوة.


اليوتيوب عامر فيديوات تيشرحو هاد القضية وهذا رابط يوتيوب تيشرح الفرق بين الإثنين والإمتيازات ديال قناة العلامة التجارية مع الحساب العادي

https://support.google.com/youtube/answer/9367690?hl=ar


لذلك حاول تبدا بداية صحيحة.


➖ ثانيا أنواع القنوات فاليوتيوب

القنوات فاليوتيوب عدة أنواع ختار النوع لي مناسبك باش تقدر تبدا القناة ديالك :


◀️1. القنوات الإخبارية، يعني قناة كتكون تابعة لقناة فضائية بحال الجزيرة ولا 2M ، وكيتبارطاجاو فيها البرامج ديالهم. 


◀️2. قنوات المدونات : Vlog أي الناس لي تيدونو حياتهم اليومية عبر الفديو، وداخل فيها حتى روتيني اليومي، هاد النوع دالقنوات تيعتامد بشكل أساسي أنك خاصك تبان فالفديو، وتصور حياتك اليومية. وتهضر على شنو تدير.


◀️3. قنوات البرامج الشخصية : هاد النوع دالقنوات فيه بزاف الأنواع، مثلا كتلقا واحد جالس تيناقش آخر أنواع التيليفونات لي خرجات والمميزات ديالها، أو كتلقا وحدة كتعلم البنات كيفاش يصاوبو ألاعيب وديكورات ويزوقو الأتاويش أو الطبخ والحلويات والشهيوات، أو كتلقا واحد تيدير التحليل الرياضي للمقابلات أو واحد تيشرح برامج وتطبيقات، أو واحد تيهضر على السفر و الترحال، او واحد تيناقش مشاكل المشاهير والأحداث ديالهم أو آخر الأخبار تيعاودهم بطريقتو .... وإلى ما لا نهاية له من البرامج، وهاد النوع دالقنوات ماشي مهم تبان لحقاش غالبا الناس كدخل تشوف المحتوى والمعلومة ماشي تشوفك نتا، إلا قررتي تبان مزيان مبغيتيش مكينش المشكل، تقدر دير فقط التعليق الصوتي وتصور المنتوج أو الموضوع لي باغي تهضر عليه.


باقي انواع القنوات ماكتهمناش حاليا ولي غنركزو عليه هو القنوات من النوع 3 لحقاش هو لي تيعتامد على تقنيات قابلة للدراسة وإعادة التطبيق.


📌أشنو المعدات لي خاصني باش نبدا قناة ؟


➖خاصك كيت، فيهم ميكروفون مافيهش التخرشيش.

خاصك تيليفون سمارتفون ميكونش تقيل بزاف يعني إنطلاقا من 1500DH باش دير المونطاج وتكون فيه كامرا مزيانة والكمرا ماشي مهمة إلا كنتي أتعتامد على المعلومة الشفوية لي غتسجلها بالميكروفون تقدر تجيب الصورة من الأنترنت بلا متصورها بكمرا الهاتف.


دابا راك 50% بديتي القناة ديالك.


📌أشنو نوع التطبيقات لي مزيانين فالمونتاج ؟


➖كاينين بزاف أنا تنفضل حسب الخبرة ديالي : ActionDirector ,InShot.

علاش هاد الزوج ؟ لحقاش ممكن بسهولة تلقا نسخة مكراكيا مافيهاش العلامة المائية لي كتخسر ليك الفديو فاش كتسالي منو. فقط كتب إسم التطبيق وزيد حداه فغوغل Apk pro و لا apk premium . وغيطلع ليك مواقع منين تيليشارجيهم بلا علامة مائية. وإلا عندك باش تشريهم شريهم.


دابا وصلتي ل 70% من نجاح القناة ديالك.


📌مازال ممقتانعش بالفكرة ديال القناة باش تنصحني ؟


➖نصيحتي ليك أن الفكرة ماشي مهمة مادام غتختارها من الفئة رقم 3. لأن أي وحدة منهم ناجحة فقط خاصك زوج الشروط. الشرط الأول تكون نتا فيك شخصية الإنسان الناجح ومغتنم الفرص. وثاني حاجة تكون قناص المناسبات.


📌أشنو علاقة المناسبات بقناة اليوتيوب ؟


➖دابا هنا فين غتكمل ديك 100% وهنا فين كاينة الخدمة.

أولا اليوتيوب تيعجبوه الناس لي تيبارطاجيو فيديوات بشكل دوري، كل نهار أو كل أسبوع. او كل شهر، متفوتش شهر!!!.

فاش كتكون كتبارطاجي فديو بشكل دوري فالوقت لي مولف ديما تبارطاجي اليوتيوب تيولي يتهلا فيك وتيولي يطلعك فالإقتراحات، يعني فاش الناس تيكونو تيشوفو شي فديو قريب للمحتوى ديال قناتك، اليوتيوب تيحط شي فديو من قناتك فواحد البلاصة سميتها، "فديوات مقترحة" المشاهد تيفهم أن الفديو ديالك عندو علاقة مع داكشي لي كان تيشوف وتيدخل يتفرج وهانتا ربحتي مشاهدات فقط بسبب أنك كتبارطاجي فيديو كل مرة فالوقت لي مولف تبارطاجي فيه.


◀️مازال مجاوبتيناش على المناسبات ؟؟؟!!!!


معندي مينتسالك بقيتي عاقل، المناسبات يعني، فاش كانت الازمة ديال المغرب وإسبانيا فسبتة كون لحتي فديو عندو علاقة بالموضوع كان غادي يربح مشاهدات بالآلاف لأنه مناسبة عندها علاقة بالمحتوى ديال الفديو لي بارطاجيتي. وهادشي لي تنعني بالمناسبات، يعني فين ما كينة شي مناسبة كتبارطاجي فديو عندو علاقة بيها، بحال كأس العالم أو نهاية كأس أوروبا أو الديربي أو عيد الفطر أو رمضان عيد الأضحى، الصيف، الدخلو المدرسي إمتحانات نهاية السنة.... المهم فهمتو الفكرة، كل فديو تيتبارطجا فالمناسبة ديالو تيتشاف بزاف، لان عدد الناس لي تيكونو تيقلبو على الفديو تيكونو بالملايين، وبالتالي النصيب ديال الفديو ديالك من داك الكم الكبير ديال البحث تيكون تاهو كبير. والمشاهدات كطلع بشكل صاروخي.


📌ولكن كيفاش اليوتيوب غادي يعرف بأن الفديو ديالي عندو علاقة بديك المناسبة. ؟


➖أنشرح ليك كيفاش الفديو ديالك تيطلع فقائمة البحث أصلا، فاش شي حد مثلا تيكتب فالبحث، "إنشاء قناة يوتيوب". فاليوتيوب أول حاجة تيقلب على الفيديوات لي عندهم فالعنوان هاد الجملة لي تكتبات فالبحث، وتيرتبهم على حساب إمتى تلاحو وعدد التعليقات واللايكات، وكل ما كان الفديو جديد وعدد التعليقات أو اللايكات طالع فهذا تيعني أن الفديو جديد وفيه معلومات جديدة والناس كتفاعل معاه إيجابيا. إذن كيتحط هو الأول. وهكذا الثاني والثالث.


ولكن فاش ما تيلقاش كلمة البحث فالعنوان تيمشي للهاشتاغات، والهاشتاغات بحالي كتقول عنواين كتكتبهم عندهم علاقة مع العنوان الأساسي، يعني إلا مكناش هذا ربما تيقصد هذا. مثلا


◀️إنشاء قناة يوتيب. <= هذا العنوان

الهاشتاغات غيكونو بالشكل الثالي

- إنشاء قناة

- إنشاء قناة يوتيوب عربية

- فتح قناة 

- فتح لاشين يوتيوب

- كيفاش نصاوب قناة

....

تنظن الفكرة واضحة، هاد الهاشتاغات بحالي الشبكة لي كتحاول تشد بيها أي إحتمال ممكن يكتبو المشاهد فالبحث وتيكون تيقصد محتوى الفديو ديالك.


هنا شي أذكياء أيقوليك أنكتب كلمة يوتيوب بوحدها 😈، وهكذا أي واحد كتب أي جملة فيها يوتيوب غيدخل عندي... هي فكرة ذكية ولكن كاين فيها واحد المشكلة.


هو أن الهاشتاغات تاهوما عندهم قوانين ديالهم، وهو شحال دالمنافسين تيستعملوهم، وشحال عدد البحث لي كيدار عليهم. فمثلا يوتيوب كطلع 9.42 مليار فديو فالبحث، يعني إحتمال الفديو ديالك يبان نسبة جد منعدمة. وكيتقلب على هاد الكلمة فالشهر 14.5 مليار مرة.


لذلك حاول تكتب كلمات مفتاحية من زوج كلمات ولا ثلاثة، وكل ماكان عدد البحث عليها فالشهر طااالع ولكن المنافسة وعدد الفيدوات لي تيطلعو فالبحث قلال فراك كتربح هاد اللعبة وغيجيوك عدد المشاهدات و المتابعين بالآلاف. إذن فهي لعبة ذكاء ويقدر غير فديو واحد إلا لقيتي شي هاشتاغ فزمن الغفلة والمنافسة عليه قليلة والبحث عليه طالع بزاف واخا يكون الفديو ديالك فيه غير صفحة كحلة غادي تربح مشاهدات بمئات الآلاف. ولكن عنداك دير صفحة كحلة راه ديزلايكات غادين يغبرو الفديو ديالك من البحث. حاول دير محتوى متناسب مع الهاشتاغ وكون ذكي في ذلك...


📌كيفاش أنعرف تنافسية الهاشتاغات ونسبة البحث عليهم فاليوتيوب ؟


➖الجواب هو عن طريق موقعين ومن الأفضل تخدم فالبيسي لا بغيتي تستافد منهم بشكل كبير. التطبيق الاول سميتو TubeBuddy و التاني VidIQ’s  وهادو تطبيقات تيتآنسطالاو فالمتصفح ديال البيسي، ولا خاصك تدخل للموقع ديالهم ودير البحث تما، غير هو خاصك تسجل وتربط قناتك عندهم باش يعطيوك أحسن الإحصائيات حسب قناتك.

هاد المواقع ماشي مجانية، ولكن كتعطيك خدمات مجانية محدودة لذلك حاول تخدم بذكاء باش تلقى هاشتاغات زوينين قبل ما تقادي العدد ديالك اليومي.


هادشي لي كاين إلا فهمتيه معمرك تحتاج دخل لشي مجموعة ديال المعاكيز سميتها تبادل الإشتراكات لأنها أغبى شي ممكن ديرو فحياتك... ولا كنتي ناوي ديرها فرا خسارة فيك هاد المجهود لي فهاد الموضوع باش تكون بنادم ذكي.


طبعا خاصك فاش توصل ل 1000 متابع و 4000 ساعة خاصك تربط حسابك البنكي باليوتيوب باش  يدوزو ليك الفلوس مباشرة لحسابك، إلا مدرتيهاش وبقيتي تسنا الشيك ديالك فيقدر يوصل على شهرين و4 شهور باش يوصلوك الفلوس لحسابك. يعني 6 شهور كاملة باش تخلص غير فشهر واحد.


هذا ماكان، طبعا كينين شي تفاصيل بسيطة بحال خاصك دير كوفيرتير زوينة للفديو ديالك وميكنوش طويل بزاف، وميكونش قصير بزاف يعني ما بين 8 تال 15 دقيقة.


وبحال تجاوب الناس فالتعليقات باش يعرفو القناة ديالك قناة حية ماشي روبو لي مسيرها. 


وأخيرا، أسوء حاجة دير هي تبارطاجي قناتك فالفايسبوك، واخا غير فالتعليقات. لحقاش تيشوف المنشور غير 1% من أصدقائك إلا بارطاجيتيها فالكونت ديالك، و1% إلا باطرجاتيهيا فشي مجموعة من 1% ديال مجموع الأعضاء ... يعني تاحد ما تيشوف منشور فيه فديو من يوتيوب إلا قلة قليلة.


صافي هادشي لي كين إلا كنتي فشكل راه ممحتاجش تعرف شي حاجة جديدة، من غير ضبط هادشي لي كين فهاد الموضوع. ✌️


تحياتي


reaction:

تعليقات